သွေးအားနည်းတာနဲ့ သွေးဖိအားနည်းတာ

Anemia and Blood pressure သွေးအားနည်းတာနဲ့ သွေးဖိအားနည်းတာ

31 Dec 10, 18:59
ကျွန်တော် သွေးထွက်လွန်ရာကနေ သွေးပေါင်ကျ သွေးနီဥနည်းတာ လတော်တော်ကြာတယ်။ ခု ပြန်ကောင်းလာပါပြီ။ ဒါပေမယ့် လူက ကြာကြာ အာရုံမစိုက်နိုင်တော့ဘူး။ ခါတိုင်း စာအုပ်ထူကြီးတွေ တစ်နေကုန် ထိုင်ဖတ်နိုင်တယ်။ အခု သူများစကားပြောရင်တောင် ကြာလာရင် အာရုံစိုက်ရ ခက်ရော။ ခေါင်းထဲမှာ အတွေးတွေက တစ်ခုမဟုတ်တစ်ခု ရှိရှိပြီး လူက အတွေးနယ်ထဲ ရောက်နေတယ်။ သွေးအားနည်းလို့ ဦးနှောက်ထဲ အောက်ဆီဂျင် အရောက်နည်းလို့ ဖြစ်တာလားလို့။ ဒါပေမယ့် သွေးအားနည်းတာလဲ ပျောက်သွားပြီ။ သွေးပေါင်လဲ ပုံမှန်ပါ။ ဘာလုပ်ရမလဲဆရာ။

မေးတဲ့သူပြောတာ အမှန်ဘဲ။ သွေးယိုရင် သွေးအားနည်းမယ်။ တိုင်းကြည့်ရင် Blood pressure ကျနေမယ်။ လူက နေမကောင်း ဖြစ်မယ်။ သွေးလဲ မယိုတော့၊ ဆေးလိုတာလဲ ကုလိုက်ရင် သွေးဖိအား ပြန်ကောင်းမယ်။ ဒါပေမဲ့ လူက မကောင်းသေးတာ ဖြစ်တတ်တယ်။ အဲဒါ သွေးအား ဆက်နည်းနေသေးတာပါ။

ဒါကို နားလည်ဘို့ Anemia “သွေးအားနည်းတာ” နဲ့ Blood pressure (BP) “သွေးဖိအား” ဆက်စပ်တာလေး နဲနဲ သိဘို့ လိုတယ်။ သွေးဖိအားကို တချို့က “သွေးပေါင်ချိန်” လို့ ခပ်လွယ်လွယ်ခေါ်တာ နုတ်ကျိုးနေကြတယ်။ “သွေးဖိအား” ဆိုမှ မှန်တယ်။ အရေအတွက်၊ ပမာဏ၊ အတိုင်းအတာတွေကို ပြောရင် ကိန်းဂဏန်းတွေရဲ့ နောက်မှာ (ယူနစ်) တခုခု ထည့် ပြောရတယ်။

“အရပ် ၅ ပေခွဲ ရှိတဲ့ မွေးလူနာ ရောက်လာတယ်။ ကိုယ်အပူချိန် ၉၈့၆ ဒီဂရီ ဖါရင်ဟိုက် နဲ့ နှလုံးခုန်နှုန်း တမိနစ်မှာ ၈ဝ ရှိတယ်။ သွေးဖိအား တိုင်းတော့ 100/70 mmHg ရှိတယ်။ ကြာနေလို့ 5% Dextrose 500 cc ထဲမှာ သားအိမ်ညှစ်အား ကောင်းတဲ့ဆေး Oxytocin 2 ml တလုံးထည့်ပြီး သွင်းပေးတယ်။ ၂ဝ၁ဝ ခုနှစ်၊ ဒီဇင်္ဘာ ၂၇ ရက် ည ၁၁ နာရီ ၃ဝ မိနစ်မှာ သူမွေးလိုက်တဲ့ ကလေးက ၅ ပေါင် ၈ အောင်စ လေးတယ်။ ကလေးခေါင်းက ၃၂ စင်တီမီတာရှိတယ်။ အလှူငွေ ၅ဝဝ ရူပီး ထည့်သွားလို့ ကျေးဇူးတင်တယ်။”

ဒီမှတ်တမ်းထဲမှာ ယူနစ်တွေ အမျိုးမျိုး တွေ့ရပါမယ်။ သွေးဖိအား ကို mmHg ဆိုတာနဲ့ မှတ်သားပါတယ်။ mm ဆိုတာ မီလီမီတာ၊ Hg ဆိုတာ (မာကျူရီ)။ သွေးဖိအားတိုင်းကရိယာမှာ မာကျူရီ ခေါ်တဲ့ ပြဒါးပါပြီး၊ ဖန်ပြွန်လေးမှာ ရေးမှတ် ထားတာတွေက မီလီမီတာတွေမို့ (မီလီမီတာ-မာကျူရီ) ဆိုပြီးရေးရတာ ဖြစ်ပါတယ်။ ပေါင် နဲ့ မဟုတ်ပါ။

သွေးဖိအား အနည်း-အများကို BP နဲ့ တိုင်းရပေမဲ့ သွေးအား အနည်း-အများကိုတော့ လူကို ကြည့်လိုက်ရင် အသားအရေ ဖြူဖွေးနေတာ မြင်ရမယ်၊ ခေါင်းမူးတယ်၊ အလုပ်လုပ်ရင် မောတယ်၊ စသဖြင့် (ကွန်ပလိန့်) လုပ်မယ်။ ဓါတ်ခွဲခန်းမှာ သွေးစစ်မှ တိတိကျကျ သိရလိမ့်မယ်။ အဖြေထွက်ရင် Hb (ဟီမိုဂလိုဘင်) ဘယ်လောက် ရှိတယ်ဆိုတာ ပါလာမယ်။
• မွေးစကလေး = 17-22 gm/dl
• ကလေး = 11-13 gm/dl
• လူကြီး-ယောက်ျား = 14-18 gm/dl
• လူကြီး-မိန်းမ = 12-16 gm/dl

နောက်ပြီး လူကြီးတယောက်မှာ သွေးထုတည် ၅ (၄့၇) လီတာ ရှိတယ်။ Drip ပုလင်း ၁ဝ ပုလင်းပေါ့။ လူ့သွေးဆိုတာ ကြည့်ရင်တော့ အရည်၊ သေသေခြာခြာ စစ်ရင် အရည်ထဲမှာ အခဲတွေလဲ ပါတယ်။ အခဲဆိုတာတွေက သွေးနီဥ၊ သွေးဖြူဥ နဲ့ သွေးမှုံတွေ ဖြစ်တယ်။ အချိုးအဆက အခဲ ၄၅% နဲ့ အရည် ၅၅%။ သွေးရဲ့အလုပ်က အာဟာရ နဲ့ အောက်စီဂျင်တွေကို သယ်ပို့ ပေးတာနဲ့ မလိုတာတွေကို ပြန်စွန့်တာလဲ လုပ်ပါတယ်။ အပူချိန်ကိုလဲ ထိန်းညှိပေးသေးတယ်။ နောက်ပြီး ရောဂါဘယ တွေကို တိုက်ထုတ်တာမှာလဲ သူပါသေးတယ်။

“တောင်ပေါ်-မြေပြန့်၊ တမြေထဲနေ-တရေထဲသောက်၊ တသွေးထဲ-တသားထဲ” ဆိုတာ အင်မတန်ကောင်းလှတဲ့ နိုင်ငံရေး (စလိုဂင်) ဖြစ်ပါတယ်။ ကွာတာလေး ထောက်ပြရင် တမျိုး မထင်ကြပါနဲ့။ အမြင့် နေရသူတွေမှာ သွေးပိုကြတယ်။ သူတို့မှာ သွေး ၁ လီတာကနေ ၁့၉ လီတာ ပိုရှိကြတယ်။ ပြောခဲ့သလို အောက်စီဂျင် သယ်ပို့တာ လုပ်ရတော့ အထက် ရောက်လေ လေပါးလေမို့၊ လိုတာ လုပ်နိုင်အောင် ပိုတာ ဖြစ်လာစေပါတယ်။

နှလုံးကနေ သွေးတွေကို ညှစ်ထုတ်နေတာက လက်ထဲမှာ စပရင်ထည့်ပြီး လက်မောင်း ကြွက်သား သန်မာအောင် လုပ်နေသလိုဘဲ။ ညှစ်လိုက်၊ လျှော့လိုက်။ မီးသတ်ပိုက်ကနေ ရေပန်းသလို မဟုတ်ပါ။ ညှစ်တဲ့အခါ Heart valves အဆို့ရှင်တွေ ဖွင့်တာ-ပိတ်တာနဲ့ နှလုံးထဲက သွေးတွေက Turbulence လှိုင်းတွေလို ဖြစ်တော့ Heart sounds နှလုံးခုန်သံဆိုတာ ဖြစ်လာစေတယ်။ ဗိုက်ထဲက ကလေး နှလုံးခုန်သံကို Doppler ကရိယာနဲ့ နားထောင်တော့ ကိုယ်ဝန် ၉-၁ဝ ပါတ် ရှိမှသာ ကြားနိုင်ပေမဲ့၊ သန္ဓေသား ၅ ပါတ်ကတည်းကနေ စခုန်တယ်။ သေဆုံးတဲ့အထိ မရပ်မနား ခုန်နေတယ်။

အဲလို နှလုံးက ညှစ်ထုတ်တဲ့အခါ သွေးတွေကနေ သွေးလွှတ်ကြောနံရံအပေါ်မှာ သက်ရောက်နေတဲ့အား ဘယ်လောက် ရှိလဲ တိုင်းတာကို Blood pressure သွေးဖိအားလို့ ခေါ်လိုက်တယ်။ သွေးဖိအားဆိုတာ အမြဲပြောင်းနေတာပါ။ နှလုံး တခါ ခုန်တာမှာ နှစ်ခါ ပြောင်းတယ် ပြောရမှာဘဲ။ နှလုံးညှစ်ချိန်မှာ ရှိတဲ့အားက များတာပေါ့။ မညှစ်တဲ့ချိန်မှာလဲ နည်းပေမဲ့၊ ဖိအားက ရှိနေတာမို့ သုညတော့ မဟုတ်ဘူး။ အပေါ်ဂဏန်းခေါ်တဲ့ များတာကို Systolic pressure အောက်ဂဏန်း၊ နည်းတာကို Diastolic pressure လို့ ခေါ်တယ်။

Blood pressure ကို သက်ရောက်စေတာတွေက အလွန့်အလွန် များတယ်။ ကြီးတာက စရရင် ကမ္ဘာ့ဆွဲအား၊ ကျား-မ၊ အသက်၊ လှုတ်ရှားမှု၊ စတာတွေ အားလုံးထဲမှာ သွေးအားနည်းတာနဲ့ တိုက်ရိုက် ဆိုင်တာတွေက သွေးအပျစ်-အကျဲ နဲ့ သွေးထုတည်။

လူတယောက် ဘာလို့ သွေးအားနည်းရလဲ။ လွယ်လွယ်လေးပြောရရင် သွေးယို-သွေးသွန်လို့ပါ။ (သွားဖုံး၊ နှာခေါင်း၊ ဆီးထဲ-ဝမ်းထဲ) ဘယ်ကပါပါ၊ (အနာ-ဒဏ်ရာ၊ မီးဖွါး၊ ကလေးပျက်၊) ဘာကြောင့် ထွက်ထွက်၊ သွေးအား နည်းမယ်။ အခု ထွက်ရင် အခု သွေးအားနည်းမယ်။ ဖြစ်နေတာကြာသူတွေမှာ နာတာရှည် သွေးအားနည်းတာ ဖြစ်မယ်။ ဒီလူနှစ်ဦး မတူကြဘူး။

“လူတွေဟာ အင်မတန် ကောင်းလွန်းတဲ့ စက်တွေထက် သာလွန်တယ်။” ကွန်ပြူတာတွေမှာ Auto ဆိုတာတွေ ရှိတယ်။ Windows automatic updates, Automatically logon the user စသဖြင့်။ ဒါပေမဲ့ လူတွေရဲ့ (အော်တို) ကို လိုက်မမီပါ။

ဆိုပါစို့ လူတယောက်ကနေ သွေး ၂ ပုလင်းစာ၊ ၁ လီတာလောက် ယိုထွက်-ကုန်ခမ်းသွားမယ်။ သူ့မှာ နေကောင်းတုံးက ၁ဝ ပုလင်း ရှိခဲ့တော့ ၈ ပုလင်းဘဲ ကျန်တော့မှာပေါ့။ ချက်ချင်း သွေးဖိအား ကျတော့မယ်။ ပြောခဲ့သလို ကွန်ပြူတာထက် ကောင်းတဲ့ သမမျှတနေစေအောင် စီမံမှုစနစ် Homeostasis ကနေ အရည်ထုထည်ကို ၁ဝ ပုလင်းစာ ပြန်ရှိလာအောင် အပြင်းအထံ ကြိုးပမ်းတော့တယ်။

သွေးထုထည်ကို သုံးမျိုးကနေ အဓိက လုပ်ပေးတယ်။ Cardiac output နှလုံးသွေးထုတ်နိုင်စွမ်း၊ Blood volume သွေးထုထည် နဲ့ Tissue perfusion တစ်ရှူးတွေရဲ့ စိမ့်ထွက်နိုင်စွမ်းတွေက သံကြိုးကွင်းဆက်တွေ ဖြစ်တယ်။ သွေးပမာဏ ကျသွားရင် နှလုံးကထုတ်နိုင်တာ လျှော့လို့ ရင်းစားပြန်ရအောင် တစ်ရှူးထဲက အရည်တွေကို ထုတ်သုံးတယ်။

အရည်တွေကို သွေးထဲ စုပ်ယူလို့ ထုထည်တော့ ပြည့်ပါရဲ့ သွေးနီဥတွေကို အချိန်မီ ထုတ်မပေးနိုင်သေးတာမို့ အခဲကနည်း အရည်က များလို့ Haemodilution သွေးကျဲတယ် ဆိုတာ ဖြစ်လာတယ်။ ရေရောတဲ့ ယမကာ သောက်ရသလို အရက်သမား မမူးပါ။ သွေးအား နည်းသူကတော့ မူးလိမ့်မယ်။ အလုပ် ပုံမှန်မလုပ်နိုင်၊ လှုတ်ရှားရင် မောလွယ်မယ်။

သွေးထုထည် တိုးလာတာနဲ့ သွေးဖိအား လိုက်တက်လာမယ်။ သွေးဖိအားကို ထိန်းညှိတဲ့ တခြား ရှုတ်ထွေးတဲ့ အစီအမံ တွေကလဲ လိုက်လုပ်ပေးတယ်။ တချိန်မှာတော့ လူနာဟာ BP တိုင်းကြည့်ရင် (နော်မယ်လ်) ဖြစ်လာလိမ့်မယ်။ ခက်တာက သူ့ကိုယ်က ပုံမှန် မရောက်သေးပါ။ ဘာတွေလိုသေးလဲ၊ ဘာတွေ ဖြစ်ကုန်တာလဲ။

သွေးနီဥရဲ့ ပင်မ တာဝန်က သွေးကို သန့်အောင်လုပ်ပေးတာ ဖြစ်တယ်။ အသက်ရှူတဲ့ထဲက အောက်စီဂျင်ကို သွေးနီဥမှာ ပါတဲ့ (ဟီမိုဂလိုဘင်) နဲ့ သွားပေါင်းပေးရတယ်။ လူတယောက်ရဲ့ သွေးတစက် (၁ စီစီ) ထဲမှာ သွေးနီဥပေါင်း ၅ သန်း၊ အဖြူ ၅ ထောင်ကနေ ၁ သောင်း၊ သွေးမှုံ ၂ သိန်းကနေ ၃ သိန်းပါတယ်။ သွေးအရည်ပိုင်း (ပလာစမာ) ထဲမှာ အာဟာရအပြင် ဓါတ်ဆားတွေလဲ ပါသေးတယ်။ သွေးအားနည်းနေသူဟာ လူပုံလူပမ်း မပိန်ရင်တောင် လေးချိန်က လျှော့နေမယ်။ ကိုယ်အလေးချိန်ရဲ့ ၁၁ ပုံ ၁ ပုံက သွေးကြောင့် လေးတာဖြစ်တယ်။ သွေးနီဥထဲက (ဟီမိုဂလိုဘင်) ဆိုတာ သံဓါတ်နဲ့ လုပ်တာမို့ လေးပါတယ်။

ဒါ့ကြောင်း သွေးယိုလို့ သွေးအားနည်းနေသူကို သွေးသွင်းတာ အကောင်းဆုံးဖြစ်တယ်။ Drip သွင်းတာဟာ အရေးပေါ်သာ ကောင်းပြီး၊ သွေးထုထည်ကိုတော့ များလာမှာမို့ (ပရက်ရှာ) တက်လာပေမဲ့ သွေးကျဲနေမယ်။ ဆေး၊ အာဟာရတွေနဲ့ ကုစားရင် အချိန်ယူရလိမ့်မယ်။ ကြားထဲကာလမှာ လူမမာသာ ဖြစ်နေအုံးမယ်။ ခြေလက် အေးစက်နေမယ်။ မျက်နှာတွေ၊ နုတ်ခမ်းတွေ ဖြူရော်နေမယ်။ Pulse လက်ကောက်ဝတ် သွေးခုန်တာ မြန်နေမယ်။ လိုတာ မီအောင် နှလုံးက ပိုလုပ်ပေးနေရလို့ပါ။

နေကောင်းတုံးကလို ရှိသမျှသွေးက တကိုယ်လုံး အနှံ့ ညီတူ-မျှတူ မဝေနိုင်ဘူး။ စိတ်ဝင်စားဘို့ ကောင်းတာက ဗဟိုကျတာ-အရေးပါတာတွေကိုသာ ဦးစားပေးရတော့တယ်။ ခြေဖျား-လက်ဖျား၊ နားရွက်နားတွေထက် နှလုံး၊ ဦးနှောက် ကျောက်ကပ်တွေကို မျက်နှာလိုက်တယ်။ Conflicts of interest “အကျိုးစီးပွါး ဝိရောဓိ ဖြစ်တယ်” ဆိုတာ နိုင်ငံရေး နဲ့ စီးပွါးရေးမှာသာ ရှိတာ မဟုတ်ပါ။ ဇီဝကမ္မဗေဒ မှာလဲ ရှိတာဘဲ။

သံဓါတ်အားဆေး၊ ဖေါလစ်အက်စစ် သောက်ရမယ်။ သံဓါတ်ကြွယ်တဲ့ အစားတွေ စားရမယ်။ ဗီတာမင်တွေလဲ လိုမယ်။ နားရအုံးမယ်။ ကောင်းလာပါလိမ့်မယ်။ တောင်ပေါ်တော့ မတက်နဲ့အုံး။

Dr. တင့်ဆွေ
၁-၁-၂ဝ၁၁